- Máis de 150 persoas participaron nos itinerarios de acompañamento da entidade financiados pola Xunta no 2024/25, dos que arredor do 30% acadaron a inserción laboral
- A xornada incluíu un encontro co alumnado e unha visita ao noso Centro de Día e Ocupacional
Esta mañá recibimos en Amicos a visita do director xeral de Inclusión Social, Arturo Parrado, nun encontro no que puidemos compartir o traballo que vimos desenvolvendo no ámbito da orientación e o emprego. Xunto a el, acompañáronnos o noso director xeral, Xoán España; o responsable da área de Alianzas con Persoas e Empresas, Miguel Beiro; e a responsable de Centros, Pilar Sampedro.
Durante a xornada fixemos entrega dos recoñecementos ás persoas participantes nos itinerarios de acompañamento laboral financiados pola Dirección Xeral de Inclusión Social. Pero o realmente importante foi o espazo de encontro que se xerou cos participantes, no que un momento compartiron experiencias, aprendizaxes e tamén as próximas metas.
As persoas participantes tiveron a oportunidade de contar en primeira persoa como foi o seu paso polo programa, como lles axudou a mellorar as súas competencias e de que maneira están a aplicar todo o aprendido no seu camiño cara ao emprego.
No marco do servizo financiado pola Dirección xeral, unhas 150 persoas participaron nestes itinerarios durante o período 2024-2025 e arredor do 30% acadaron un emprego.
Como destacou o noso director xeral, Xoán España, este tipo de programas van moito máis alá da inserción laboral: “permiten que as persoas poidan desenvolver unha vida máis autónoma e normalizada. E iso só é posible grazas ao apoio das administracións públicas, que fan posible que sigamos acompañando a quen máis o precisa”.
Pola súa banda, Arturo Parrado puxo en valor o traballo realizado polo equipo de Amicos e a importancia de seguir impulsando iniciativas que faciliten o acceso ao emprego, especialmente para as persoas con máis dificultades.
A xornada continuou cun percorrido polo noso Centro de Atención Integral, onde puido coñecer de preto as actividades, obradoiros e proxectos que desenvolven as persoas que acoden á entidade.
NOVAS EN MEDIOS:
Para máis información:
981 865 716
658 753 047
