- A exhibición está situada na rúa peatonal Doutor Santos Mieites, fronte á Panadería Susi
- Ao acto de presentación asistiu José Ramón Romero, alcalde de Boiro, Digna Iglesias e Xoán España, vicepresidenta e director xeral de Amicos; así como alumnado do CEIPP Praia Xardín e do CEEPR Amicos
A exposición itinerante impulsada por Amicos con motivo do Día Mundial da Concienciación sobre o Autismo continúa o seu percorrido polo Barbanza. Despois de visitar Ribeira, Porto do Son e A Pobra do Caramiñal, a mostra aterrou este 15 de abril no centro de Boiro. Para darlle a benvida, este luns a entidade organizou un acto na rúa Doutor Santos Mieites 15, lugar da súa instalación, no que participaron autoridades e escolares da zona.
O evento comezou a media mañá da man do alumnado de Centro de Educación Especial de Amicos, que foron os encargados de conducir un xogo de adiviñar palabras relacionadas co autismo. Nel participaron as nenas e nenos de 4º de primaria do CEIP Plurilingüe Praia Xardín e os amicos e amicas do centro de día de Amicos.
A continuación os peques de Oleiros procederon á lectura dun manifesto no que continuaron a reclamar unha educación de calidade que se adapte ás necesidades e circunstancias de todo o alumnado. Tamén destacaron a necesidade de accións que favorezan a inclusividade.
Pero o prato forte foi a presentación da exhibición, ubicada no casco urbano de Boiro, fronte á Panadería Susi. Alí permanecerá durante toda a semana, do luns 15 ao domingo 21 de abril. A mostra consiste en tres tótems con información sobre o trastorno do espectro autista, que busca sensibilizar e concienciar á comunidade sobre a realidade das persoas con autismo.
“Implicación do CEEPR de Amicos cos colexios da zona en referencia á inclusión”
Ao acto acudiron tamén o alcalde de Boiro, José Ramón Romero, a vicepresidenta de Amicos, Digna Iglesias, e Xoan España, director xeral da asociación; aos que se uniron algunhas familias de beneficiarios/as e varios viandantes.
Con respecto á chegada desta mostra a Boiro, a vicepresidenta da entidade boirense quixo destacar “a implicación do CEEPR de Amicos cos colexios da zona á hora de levar a cabo accións referentes á inclusión. Nesta ocasión, con esta campaña coa que estamos percorrendo distintos municipios buscamos divulgar e sensibilizar sobre o autismo”. Tamén quixo dirixirse aos alumnos do CEIPP Praia Xardín para “agradecer que colaboredes e desfrutedes hoxe con nós. Tamén quero agradecerlle ao Concello de Boiro, en especial ao alcalde, que estea con nós apoiando esta acción coa que sensibilizar e concienciar sobre o autismo á sociedade. Gracias a todos por vir.”
Pola súa banda, Romero deulle a benvida a Boiro “a todos os nenos e nenas do CEEPR de Amicos. Quero tamén darlle as grazas a Amicos por darlle visibilidade ao autismo e por contar con Boiro para iso, e en especial ás profesoras e profesores de Amicos pola boa labor que están realizando”.
Próximas paradas da exhibición de Amicos
Esta campaña informativa naceu coa idea de percorrer distintos puntos do Barbanza para achegarse aos veciños e veciñas de todos os puntos da comarca, co obxectivo de democratizar información sobre o autismo e normalizar este trastorno.
Despois dunha semana en Boiro, a próxima etapa no itinerario da exhibición sobre o autismo de Amicos será Rianxo. Alí estará instalada na Praza de Padrón entre o 22 e o 28 de abril. Noia acollerá a exposición do 28 de abril ao 6 de maio na Praza do Concello e Lousame será a última parada no itinerario, onde os monolitos estarán instalados do 6 ao 12 de maio, tamén fronte a casa consistorial.
Ata o de agora, xa percorreu os concellos de Ribeira do 2 ao 7 de abril, Porto do Son entre o 8 e o 10 do mesmo mes, e A Pobra entre o 11 e o 14.
NOVAS EN MEDIOS
Para máis información:
981 865 716
658 753 047
