- A visita permitiunos compartir de preto o noso modelo de atención centrado na persoa e o impacto do proxecto Somos Más. Somos Amicos, financiado por Banco Santander e Santander Asset Management.
- A xornada rematou cunha acción de restauración de fondos mariños no Parque Nacional Marítimo-Terrestre das Illas Atlánticas, onde introducimos no mar preto dun cento de soportes de laminaria.
A visita de Banco Santander e Santander Asset Management ao noso Centro de Atención Integral de Boiro permitiunos compartir de preto o impacto do traballo que desenvolvemos cada día para favorecer a inclusión social das persoas con discapacidade intelectual e contribuír á conservación do medio ambiente.
Durante o percorrido polas nosas instalacións, os representantes de ambas entidades coñeceron o noso modelo de atención centrado na persoa e descubriron distintas actividades orientadas a promover a autonomía, a participación comunitaria e o desenvolvemento persoal das persoas que forman parte de Amicos.
A xornada continuou no noso Laboratorio de Macroalgas, onde os nosos activistas medioambientais explicaron o traballo que desenvolvemos na recuperación dos ecosistemas costeiros e o seu papel como axentes de sensibilización ambiental.
Como peche da visita, participamos nunha acción de restauración de fondos mariños no Parque Nacional Marítimo-Terrestre das Illas Atlánticas. Xunto cos representantes de Banco Santander e Santander Asset Management introducimos no mar preto dun cento de soportes de laminaria, unha especie clave para a formación dos bosques de kelp. Estes ecosistemas constitúen un importante refuxio para a biodiversidade mariña, favorecen a recuperación de especies de interese pesqueiro e contribúen á captura de carbono.
A visita tamén foi unha oportunidade para compartir os avances de Somos Más. Somos Amicos, unha iniciativa enmarcada no programa Comprometidos Somos Más, financiado por Banco Santander S.A. e Santander Asset Management SGIIC. Grazas a este impulso seguimos promovendo actividades culturais, deportivas, ambientais e de lecer que favorecen a inclusión social, fortalecen a autonomía, reforzan as relacións sociais e impulsan unha participación activa na comunidade.
Este encontro permitiunos seguir reforzando a colaboración con Banco Santander e Santander Asset Management e poñer en valor a importancia das alianzas entre o terceiro sector e a empresa privada para impulsar proxectos con impacto social, ambiental e comunitario.
Para máis información:
981 865 716
658 753 047
hola@amicos.org
