Os días 11 e 12 de xuño estivemos en Roma participando no encontro transnacional final do proxecto europeo MUSE – MusicArtTherapy to Strengthen Employability of Young Musicians and Caregivers, unha iniciativa financiada polo programa Erasmus+ da Unión Europea que nos permitiu explorar novas formas de conectar arte, inclusión e empregabilidade.
Como entidade coordinadora do proxecto, compartimos esta experiencia xunto á Università Popolare di MusicArTerapia – Metodo Stefania Guerra Lisi e á Cooperativa Umanista Mazra, dúas organizacións italianas especializadas en musicarterapia, formación e intervención social. Durante estes dous días tivemos a oportunidade de facer balance do traballo realizado, analizar os resultados acadados e preparar o peche dunha iniciativa que nos deixou importantes aprendizaxes.
En representación de Amicos participaron Sara Mejuto, técnica de proxectos europeos, e Sara Albitres, profesora do CEEPR Amicos, que formaron parte das distintas sesións de traballo centradas na avaliación das actividades desenvolvidas, a revisión da documentación final e a análise do impacto conseguido ao longo destes meses.
Un dos aspectos máis relevantes do proxecto foi a formación especializada impartida pola Università Popolare di MusicArTerapia – Metodo Stefania Guerra Lisi, baseada na metodoloxía MusicArtTherapy in the Globality of Languages. A través deste enfoque, músicos e profesionais do ámbito dos coidados puideron adquirir novas ferramentas expresivas, comunicativas e relacionais para acompañar a persoas con discapacidade e outros colectivos con necesidades de apoio.
A música, o movemento, a expresión corporal e a creatividade convertéronse así en elementos clave para favorecer a comunicación, a inclusión e o desenvolvemento persoal. Ademais, MUSE permitiu visibilizar o potencial da musicarterapia como ferramenta para mellorar a empregabilidade e ampliar as competencias profesionais en ámbitos vinculados ao coidado e á intervención social.
Desde Amicos facemos unha valoración moi positiva desta experiencia. Os proxectos europeos son unha oportunidade para aprender doutras organizacións, compartir coñecemento e incorporar novas metodoloxías que enriquecen os apoios que ofrecemos ás persoas con discapacidade. Ademais, permítennos seguir construíndo redes de colaboración internacional que impulsan a innovación e favorecen unha sociedade máis inclusiva.
Co encontro de Roma pechamos unha etapa importante de MUSE, consolidando os resultados acadados e culminando un proceso de cooperación internacional que nos permitiu unir formación, arte, inclusión e empregabilidade nun mesmo proxecto. Un camiño que remata, pero cuxas aprendizaxes seguirán acompañándonos no noso día a día.
Para máis información:
981 865 716
658 753 047
